គណៈកម្មាធិការរៀបចំការបោះឆ្នោត (គ.ជ.ប) បានបញ្ចប់ការត្រួតពិនិត្យ និងផ្ទៀងផ្ទាត់លទ្ធផលនៃការបោះឆ្នោតជ្រើសតាំងតំណាងរាស្រ្ដ នីតិកាលទី៦ ឆ្នាំ២០១៨ ហើយ កាលពីថ្ងៃទី៦ ខែសីហា ឆ្នាំ២០១៨ ម្សិលមិញ។ នេះបើយោងតាមសេចក្ដីប្រកាសព័ត៌មានរបស់ គ.ជ.ប ចុះថ្ងៃទី៧ ខែសីហានេះ។
នៅក្នុងសេចក្ដីប្រកាសព័ត៌មាននោះ គ.ជ.ប បានឲ្យដឹងថា ក្រោយការត្រួតពិនិត្យ និងផ្ទៀងផ្ទាត់រយៈពេល ៣ថ្ងៃ ជាលទ្ធផល ក្រុមការងារ មិនបានរកឃើញនូវកំហុសណាមួយ ពាក់ព័ន្ធនឹងលទ្ធផលនៃការបោះឆ្នោត ដែលរាជធានី ខេត្ត បានបញ្ជាក់ក្នុងតារាងបូកសរុបលទ្ធផលនៃការបោះឆ្នោតក្នុងរាជធានី/ខេត្ត (ទម្រង់ ១១១០) កំណត់ហេតុបូកសរុបលទ្ធផលនៃការបោះឆ្នោតក្នុងរាជធានី/ខេត្ត (ទម្រង់ ១១១១) និងក្រដាសលទ្ធផលនៃការបោះឆ្នោតក្នុងរាជធានី/ខេត្ត (ទម្រង់ ១១១៤) ឡើយ។
គ.ជ.ប បញ្ជាក់ថា លទ្ធផលនៃការត្រួតពិនិត្យ និងផ្ទៀងផ្ទាត់នេះ បានទទួលការឯកភាព និងចុះហត្ថលេខា ពីភាគីដែលជាសាក្សីទាំងអស់ ដែលមានតំណាងគណបក្សនយោបាយផងដែរ។
សូមបញ្ជាក់ថា លទ្ធផលបណ្ដោះអាសន្ននៃការបោះឆ្នោតជ្រើសតាំងតំណាងរាស្រ្ដ នីតិកាលទី៦ ឆ្នាំ២០១៨ នឹងត្រូវប្រកាសនៅថ្ងៃទី១១ ខែសីហា ឆ្នាំ២០១៨ តាមរយៈវិទ្យុ និងទូរទស្សន៍ជាតិកម្ពុជា៕
Comments
Post a Comment