អតីតឧបការីផ្ទាល់សម្តេចក្រុមព្រះ ប្តឹងអនុប្រធាន និងអគ្គលេខាធិការបក្សហ៊្វុនស៊ិនប៉ិច ទៅតុលាការ
លោក មៀច សំរួល អតីតឧបការីផ្ទាល់សម្តេចក្រុមព្រះ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច បានដាក់ពាក្យប្តឹងលោក យឹម សាវី អគ្គលេខាធិការគណបក្ស និងលោក ប៉ោ ប៊ុនស្រ៊ឺ អនុប្រធានគណបក្ស ទៅតុលាការ ពីបទផ្តួចផ្តើម និងសមគំនិតធ្វើលិខិតរដ្ឋបាលបញ្ចប់សមាជិកភាពរូបលោក។ ពាក្យបណ្តឹង ត្រូវបានដាក់ចូលតុលាការកាលពីរសៀលថ្ងៃទី៧ ខែសីហា ឆ្នាំ២០១៨។
យោងតាមពាក្យបណ្តឹងដែលទទួលបាន លោក មៀច សំរួល បានអះអាងថា ការបញ្ចប់សមាជិកភាពលោកពីគណបក្សហ៊្វុនស៊ិនប៉ិច ធ្វើឡើងក្នុងចេតនាទុច្ចរិត ធ្វើឱ្យប៉ះពាល់កិត្តិយស សេចក្តីថ្លៃថ្នូរ និងផលប្រយោជន៍ស្របច្បាប់យ៉ាងធ្ងន់ធ្ងរ។ ដូច្នេះលោកកើតទុកមិនសុខចិត្ត សូមប្តឹងទាមទារសំណងនៃការក្បត់ទំនុកចិត្ត និងជំងឺចិត្តព្រមទាំងការលះបង់ និងចំណាយផ្សេងៗរបស់ខ្លួនទៅលើគណបក្សកន្លងមកចំនួន ៤០០លានរៀល។
ទាក់ទងនឹងករណីនេះ លោក យឹម សាវី បានថ្លែងប្រាប់ [ខ្លីៗ] នាថ្ងៃទី៨សីហានេះថា ចំពោះករណីបញ្ចប់សមាជិកភាពលោក មៀច សំរួល គឺលោកមិនមែនជាអ្នកបញ្ចប់ទេ តែសម្តេចក្រុមព្រះ នរោត្តម រណឫទ្ធិ គឺជាអ្នកចុះហត្ថលេខាបញ្ចប់សមាជិកភាពលោកមៀច សំរួល។
លោកថា៖ «គណបក្សមួយ គេមានសិទ្ធិរបស់គេ គេធ្វើនយោបាយ គ្មានអ្នកណាគេចង់បាត់សមាជិកទេ ក៏ប៉ុន្តែសមាជិកណា ដែលធ្វើឱ្យអន្តរាយដល់បក្ស បក្សក៏មានសិទ្ធិបញ្ចប់ដែរ»។
Comments
Post a Comment