ក្រសួងវិទ្យាសាស្រ្តនិងបច្ចេកវិទ្យាវៀតណាម និងក្រុមហ៊ុន Airbus កាលពីពេលថ្មីៗនេះ បានចុះហត្ថលេខាលើឯកសារមួយ ដែលអនុញ្ញាតឱ្យភាគីទាំង២ ធ្វើការរួមគ្នាលើវិស័យអវកាស។ ក្នុងនោះមានការផ្លាស់ប្តូរព័ត៌មានគ្នាដែលពាក់ព័ន្ធនឹងការអង្កេតផែនដី ការរៀបចំនិងចូលរួមព្រឹត្តិការណ៍វិទ្យាសាស្រ្ត និងបច្ចេកវិទ្យា និងការស្រាវជ្រាវបច្ចេកវិទ្យាផ្កាយរណបជាដើម។ នេះបើតាមការចេញផ្សាយរបស់សារព័ត៌មាន Vietnam Economics Times កាលពីថ្ងៃទី២សីហាម្សិលមិញ។
លោក Nicolas Chamussy ប្រធានផ្នែកប្រព័ន្ធអវកាស នៃក្រុមហ៊ុន Airbus បាននិយាយថា ក្រុមហ៊ុន Airbus និងវៀតណាម បានក្លាយជាដៃគូគ្នារួចមកហើយ លើការបង្ហោះផ្កាយរណប VNREDSat-1។ ចំណែកឯកសារដែលបានចុះហត្ថលេខារួមគ្នាកាលពីពេលថ្មីៗនេះ នឹងអាចឱ្យភាគីទាំង២ គាំទ្រ និងអភិវឌ្ឍបន្ថែមទៀត ចំពោះឧស្សាហកម្មអវកាសរបស់វៀតណាម។
គួររំលឹកថា កាលពីឆ្នាំ២០១០ Airbus បានឈ្នះក្នុងការចុះកុងត្រាជាមួយវៀតណាម ដើម្បីអភិវឌ្ឍ ផលិត និងបាញ់បង្ហោះផ្កាយរណប VNREDSat-1 ដែលជាផ្កាយរណបសម្រាប់អង្កេតផែនដីជាលើកដំបូងរបស់ប្រទេសអាស៊ាន១នេះ។ ផ្កាយរណបនេះ ត្រូវបានបាញ់បង្ហោះដោយជោគជ័យកាលពីឆ្នាំ២០១៣ ដោយបានធ្វើឱ្យវៀតណាម អាចត្រួតពិនិត្យ និងសិក្សាពីឥទ្ធិពលនៃការប្រែប្រួលអាកាសធាតុ ព្យាករ និងចាត់វិធានការទប់ស្កាត់គ្រោះធម្មជាតិនានា ព្រមទាំងការគ្រប់គ្រងធនធានធម្មជាតិរបស់ខ្លួនផងដែរ៕
Comments
Post a Comment