[ខ្លីៗ] សូមលើកយកព្រឹត្តិការណ៍នយោបាយជាតិ និងអន្តរជាតិសំខាន់ៗ ដែលមានឡើងក្នុង១សប្តាហ៍មកនេះ មកបង្ហាញជូនដូចខាងក្រោម៖
ព្រឹត្តិការណ៍នយោបាយជាតិ
១. កម្ពុជា បង្ហាញការសោកស្តាយចំពោះការវាយតម្លៃរបស់បរទេស ជុំវិញការបោះឆ្នោត
ក្រសួងការបរទេសកម្ពុជា បានចេញសេចក្តីថ្លែងការណ៍កាលពីថ្ងៃទី៣១ ខែកក្កដា ឆ្នាំ២០១៨ ដោយបង្ហាញពីភាគជោគជ័យនៃដំណើរការការបោះឆ្នោតជ្រើសតាំងតំណាងរាស្រ្តនីតិកាលទី៩ កាលពីថ្ងៃទី២៩ ខែកក្កដា ឆ្នាំ២០១៨ ប៉ុន្តែក៏បានបង្ហាញពីភាពសោកស្តាយរបស់ប្រទេសមួយចំនួន ដែលបានវាយតម្លៃថា ការបោះឆ្នោតនៅកម្ពុជា គ្មានភាពសេរី ត្រឹមត្រូវ យុត្តិធម៌ មិនតំណាងឱ្យឆន្ទៈប្រជាជនខ្មែរ និងមិនអាចទទួលយកបាននោះឡើយ។
២. សំណុំរឿងលោក កឹម សុខា នឹងត្រូវជំនុំជម្រះនៅតុលាការកំពូល នាថ្ងៃទី២២សីហា
យោងតាមលិខិតរបស់លោក ឈួន ចាន់ថា អគ្គព្រះរាជអាជ្ញារង នៃមហាអយ្យការអមតុលាការកំពូល ចុះថ្ងៃទី០១ ខែសីហា ឆ្នាំ២០១៨ ឱ្យដឹងថា តុលាការកំពូល នឹងបើកសវនាការជំនុំជម្រះលើសំណុំរឿងលោក កឹម សុខា អតីតប្រធាននៃអតីតគណបក្សសង្គ្រោះជាតិ នៅថ្ងៃទី២២ ខែសីហា ឆ្នាំ២០១៨ ខាងមុខនេះ ពាក់ព័ន្ធនឹងសំណុំរឿងសន្ទិដ្ឋិភាពជាមួយបរទេស។
៣. សម្តេច ហ៊ុន សែន អំពាវនាវកុំឱ្យមានការរើសអើងគ្នា ជុំវិញការទៅ ឬមិនទៅបោះឆ្នោត
ក្នុងពិធីសំណេះសំណាលជាមួយកម្មករ នៅខណ្ឌពោធិ៍សែនជ័យ កាលពីថ្ងៃទី២សីហា ២០១៨ សម្តេច ហ៊ុន សែន បានអំពាវនាវកុំឲ្យមានការរើសអើង ឬការចោទប្រកាន់គ្នា រវាងអ្នកទៅបោះឆ្នោត និងអ្នកមិនទៅបោះឆ្នោត។ តាមរបាយការណ៍របស់ គ.ជ.ប បានបញ្ជាក់ថា ចំនួនប្រជាពលរដ្ឋដែលបានទៅចូលរួមបោះឆ្នោតមានជាង ៦,៩លាននាក់ ស្មើនឹងជាង ៨២% នៃអ្នកមានឈ្មោះក្នុងបញ្ជីបោះឆ្នោត។
៤. ផែនការធ្វើយុទ្ធនាការ "ស្នាមមេដៃមួយដើម្បីកោះត្រល់" របស់បក្សខ្មែរក្រោក រងការព្រមាន
គណបក្សខ្មែរក្រោក បានប្រកាសកាលពីថ្ងៃទី៣១កក្កដា ២០១៨ថា ខ្លួននឹងចាប់ផ្តើមធ្វើយុទ្ធនាការ "ស្នាមមេដៃមួយដើម្បីកោះត្រល់" នាថ្ងៃទី៨ ខែសីហា ឆ្នាំ២០១៨។ ប៉ុន្តែអាជ្ញាធរបានព្រមានគណបក្សនេះថា នឹងត្រូវប្រឈមចំពោះមុខច្បាប់ ប្រសិនបើមិនមានច្បាប់អនុញ្ញាតទេនោះ។
៥. គ.ជ.ប បញ្ចេញប្រតិកម្ម ចំពោះការចោទប្រកាន់របស់លោក ខឹម វាសនា
កាលពីថ្ងៃទី៣ និង ៤ សីហា ២០១៨ គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ចេញប្រតិកម្ម និងឆ្លើយតបចំពោះការចោទប្រកាន់ជាច្រើនរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ (LDP) មកដល់មន្រ្តីរៀបចំការបោះឆ្នោត។ ការចោទប្រកាន់ទាំងនោះមានដូចជា ការលួចបំប៉ោងសំឡេងឆ្នោតក្នុងទម្រង់ ១១០៩, ការគាបសង្កត់ភ្នាក់ងារគណបក្សមកពី LDP, ការចាប់វាយខ្នោះភ្នាក់ងារគណបក្សនយោបាយ, ប្រជាពលរដ្ឋចូលរួមបោះឆ្នោតត្រឹម ៧០%ប៉ុណ្ណោះ (គ.ជ.ប ថា ជាង ៨២%) និងការហាមឃាត់មិនឱ្យថតសកម្មភាពរាប់សន្លឹកឆ្នោតជាដើម។
ព្រឹត្តិការណ៍នយោបាយអន្តរជាតិ
១. កូរ៉េខាងជើង រងការសង្ស័យថា កំពុងផលិតមីស៊ីលអន្តរទ្វីបថ្មី
វាស៊ីងតោនប៉ុស្តិ៍ បានរាយការណ៍កាលពីថ្ងៃទី៣០ ខែកក្កដា ឆ្នាំ២០១៨ថា កូរ៉េខាងជើងកំពុងផលិតមីស៊ីលបាលីស្ទីកអន្តរទ្វីបថ្មី ដែលអាចបាញ់ដល់សហរដ្ឋអាមេរិក ទោះមានការចរចារវាងមេដឹកនាំអាមេរិក និងកូរ៉េខាងជើង អំពីការបញ្ឈប់នុយក្លេអ៊ែរ កាលពីខែមិថុនាក៏ដោយ។ រោងចក្រដែលផលិតមីស៊ីលថ្មីនេះ ស្ថិតក្នុងក្រុង Sanumdong មានចម្ងាយប្រមាណ ២៧គីឡូម៉ែត្រពីក្រុងព្យុងយ៉ាង។
២. ថៃ ស្នើឱ្យអង់គ្លេស ធ្វើបត្យាប័ន លោកស្រី យីងឡាក់
BBC បានចុះផ្សាយកាលពីថ្ងៃទី៣១ ខែកក្កដា ឆ្នាំ២០១៨ថា រដ្ឋាភិបាលថៃ បានស្នើឲ្យមានការធ្វើបត្យាប័នអតីតនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា ពីចក្រភពអង់គ្លេស ខណៈដែលលោកស្រី ត្រូវបានគេជឿថា កំពុងស្នាក់នៅក្នុងប្រទេសនោះ។ ស្ថានទូតថៃនៅក្រុងឡុងដ៍ បានដាក់លិខិតមួយ អមដោយសេចក្ដីចម្លងនៃឯកសាររបស់តុលាការ ព្រមទាំងដីកាចាប់ខ្លួន ទៅកាន់អាជ្ញាធរអង់គ្លេស ដើម្បីនាំខ្លួនលោកស្រីយីងឡាក់ មកទទួលទោសនៅថៃ។
៣. ចិន ប្រតិកម្មជុំវិញការដំឡើងទង់តៃវ៉ាន់ នៅវៀតណាម
រដ្ឋមន្ត្រីការបរទេសរបស់បណ្ដាប្រទេសក្នុងតំបន់អាស៊ាន បានចាប់ផ្តើមកិច្ចប្រជុំ កាលពីថ្ងៃទី០២ សីហា ឆ្នាំ២០១៨ នាប្រទេសសិង្ហបុរី ដែលផ្ដោតសំខាន់លើប្រធាន ២ ក្នុងនោះមាន កម្មវិធីអាវុធនុយក្លេអ៊ែរកូរ៉េខាងជើង និងជម្លោះសមុទ្រចិនខាងត្បូង។ រដ្ឋមន្ត្រីការបរទេសអាស៊ាន បានស្វាគមន៍ចំពោះស្មារតីរបស់មេដឹកនាំកូរ៉េខាងជើង ក្នុងការរំសាយអាវុធនុយក្លេអ៊ែរ ដែលបានចុះហត្ថលេខាជាមួយលោក ដូណាល់ ត្រាំ នៅក្នុងកិច្ចប្រជុំកំពូលកាលខែមិថុនាកន្លងទៅ នាប្រទេសសិង្ហបុរី។ ជាមួយគ្នានេះដែរ ក្រុមរដ្ឋមន្ត្រីទាំងអស់ ក៏នឹងស្វាគមន៍នូវដំណើរការនៃការចរចារវាងប្រទេសអាស៊ានទាំង១០ ជាមួយចិន ដើម្បីឆ្ពោះទៅរកការសម្រេចបឋមនៃប្រសិទ្ធភាពរបស់ក្រមប្រតិបត្តិសមុទ្រចិនខាងត្បូង(COC) លើអ្វីដែលពួកគេ បានយល់ព្រម កាលពីពេលកន្លងមក។
Comments
Post a Comment