ប្រសិនបើការប្តឹងទៅនឹងលទ្ធផលបោះឆ្នោតបឋម មានធាតុផ្សំនៃបណ្តឹងគ្រប់គ្រាន់ ធ្វើឱ្យគណៈកម្មាធិការជាតិរៀបចំការបោះឆ្នោត (គ.ជ.ប) ជឿជាក់បានថា ពិតជាមានភាពមិនប្រក្រតីកើតឡើងធ្ងន់ធ្ងរ ដែលប៉ះពាល់ទៅដល់លទ្ធផលនៃការបោះឆ្នោត នោះទើបនាំទៅដល់ការបោះឆ្នោតសាជាថ្មី។ នេះបើតាមការបញ្ជាក់របស់លោក សោម សូរីដា អគ្គលេខាធិការរង គ.ជ.ប ក្នុងបទសម្ភាសមួយជាមួយសារព័ត៌មានដើមអម្ពិល កាលពីថ្ងៃទី២ ខែសីហា ឆ្នាំ២០១៨។
លោកបន្តថា ប្រសិនបើពុំមានភស្តុតាង ទឡ្ហីករណ៍ ឬធាតុផ្សំគ្រប់គ្រាន់ដែលបង្ហាញពីកំហុសរបស់គណៈកម្មការរៀបចំការបោះឆ្នោតណាមួយ និងភាពមិនប្រក្រតីធ្ងន់ធ្ងរណាមួយ ធ្វើឱ្យប៉ះពាល់ដល់លទ្ធផលបោះឆ្នោតទេនោះ គ.ជ.ប នឹងសម្រេចអំពីការបដិសេធលទ្ធផលមួយផ្នែក ឬទាំងមូលនៃការបោះឆ្នោត ហើយដែលអាចនាំទៅដល់ការបោះឆ្នោតសាជាថ្មីផងដែរ។
មន្រ្តីជាន់ខ្ពស់ គ.ជ.ប រូបនេះ ក៏បានពន្យល់ដែរថា ចំពោះការមិនទទួលស្គាល់ របស់បរទេសមួយចំនួនដូចជា អាមេរិក សហភាពអឺរ៉ុប អង់គ្លេស ឬអាល្លឺម៉ង់ ដែលថាការបោះឆ្នោតមិនត្រឹមត្រូវ ហើយនាំទៅដល់ការបោះឆ្នោតសាជាថ្មីនោះ គឺជារឿងមិនអាចធ្វើទៅបានឡើយ ព្រោះផ្ទុយនឹងច្បាប់របស់ប្រទេស។
សូមជម្រាបថា គ.ជ.ប នឹងប្រកាសលទ្ធផលបោះឆ្នោត ចំនួនអាសនៈរដ្ឋសភា និងឈ្មោះអ្នកតំណាងរាស្រ្តដែលគណបក្សនីមួយៗទទួលបាន ជាផ្លូវការនៅថ្ងៃទី ១៥ ខែសីហា ឆ្នាំ២០១៨៕
Comments
Post a Comment