យ៉ាងហោចណាស់ រោងចក្រចំនួន ៨០% នៃរោងចក្រកែច្នៃគ្រាប់ស្វាយចន្ទីសរុបក្នុងប្រទេសវៀតណាម បានបិទទ្វារជាបន្តបន្ទាប់ គិតចាប់តាំងពីខែមិថុនា ឆ្នាំ២០១៨មក ដោយសារកង្វះវត្ថុធាតុដើម និងទុន។ នេះបើតាមការអះអាងរបស់សមាគមគ្រាប់ស្វាយចន្ទីវៀតណាម ហៅកាត់ VINACAS កាលពីពេលថ្មីៗកន្លង។
លោក Hue Chi Thai ទីប្រឹក្សានៃសមាគម VINACAS បានឲ្យដឹងថា រោងចក្រកែច្នៃគ្រាប់ស្វាយចន្ទីនៅវៀតណាមទាំងអស់ មានសមត្ថភាពកែច្នៃគ្រាប់ស្វាយចន្ទីប្រមាណជា ១,៦លានតោនក្នុង១ឆ្នាំ និងបង្កើតការងារសម្រាប់ពលរដ្ឋវៀតណាមរាប់ពាន់នាក់ នៅបណ្ដាខេត្តភាគខាងត្បូងប្រទេសវៀតណាម ដូចជា ខេត្ត Binh Phuoc, Long An និង Dong Nai ជាដើម។
លោកបន្តថា ស្ថានភាពបច្ចុប្បន្ន បានធ្វើឲ្យកម្មកររោងចក្រកែច្នៃគ្រាប់ស្វាយចន្ទី បាត់បង់ការងារ ឬផ្លាស់ប្ដូរទៅធ្វើការងារផ្សេងៗ ឬ ត្រឡប់ទៅស្រុកកំណើតរបស់ពួកគេវិញ។
ចំណែកលោក Nguyen Duc Thanh ប្រធានសមាគម VINACAS បានឲ្យដឹងថា ឧបសគ្គរបស់សមាគមគឺ ការស្វែងរកប្រភពនាំចូលគ្រាប់ស្វាយចន្ទីមិនទាន់កែច្នៃ ៥០ម៉ឺនតោន សម្រាប់ផ្គត់ផ្គង់រោងចក្រ និងនាំចេញ ឲ្យបានដល់ដំណាច់ឆ្នាំ២០១៨។
លោកក៏បានអំពាវនាវឲ្យមានការផ្ដល់កម្ចីដល់រោងចក្រ ពីធនាគារនានា ក្នុងទឹកប្រាក់ប្រមាណ ៨០០លានដុល្លារ តែមកទល់ពេលនេះ មិនមានធនាគារណាមួយ ផ្ដល់កម្ចីនោះទេ។ គ្រាប់ស្វាយចន្ទីមិនទាន់កែច្នៃ ត្រូវបានស្តុកចោលនៅកំពងផែ ឬឃ្លាំងនានា ដោយសាររោងចក្រគ្មានទុនដើម្បីទិញ៕
Comments
Post a Comment