លោក មូន ចេអ៊ីន ប្រធានាធិបតី កូរ៉េខាងត្បូង នៅ ថ្ងៃ ទី៣ ខែ សីហា ២០១៨ នេះ បាន ដក តំណែង លោក Lee Suk-koo មេបញ្ជាការ អង្គភាព ចារកម្ម កងទ័ព និង ជំនួស វិញ ដោយ លោក Nam Young-sin ដែល បច្ចុប្បន្ន ជា មេបញ្ជាការ កងទ័ព នៃ អាវុធ ពិសេស។
លោក មូន ក៏ បាន បញ្ជា ឲ្យ បង្កើត បញ្ជាការ កងទ័ព ថ្មី ដែល ខុស ពី បញ្ជាការ កងទ័ព មុន ក្រោយ មាន ការ ចោទ ប្រកាន់ ថា ពាក់ព័ន្ធ នឹង រឿង នយោបាយ។ នេះ បើ តាម សេចក្តី ប្រកាស ព័ត៌មាន របស់ លោក Yoon Young-chan អ្នកនាំពាក្យ ប្រធានាធិបតី កូរ៉េខាងត្បូង នៅ ថ្ងៃ ទី៣ ខែ សីហា ២០១៨ នេះ។
ជាមួយគ្នានេះ លោក មូន បានបញ្ជាឲ្យតែងតាំងអ្នកត្រួតពិនិត្យដែលមិនមែនជាយោធាម្នាក់ ដើម្បីធ្វើការស៊ើបអង្កេតរាល់បទល្មើសទាំងអស់ក្នុងអង្គភាព និងចាត់វិធានការបន្ទាប់ ជាការឆ្លើយតប។
បទបញ្ជារបស់ប្រធានាធិបតីកូរ៉េខាងត្បូង គឺធ្វើឡើងមួយថ្ងៃប៉ុណ្ណោះ ក្រោយគណៈកម្មាធិការកំណែទម្រង់នៃក្រសួងការពារជាតិបានលើកឡើងពីកម្រងការផ្លាស់ប្ដូរជាច្រើន រួមទាំងការកាត់បន្ថយចំនួនកងទ័ពប្រមាណ ៤២០០០នាក់ផងដែរ៕
Comments
Post a Comment