អាមេរិក នឹងដកទ័ពចេញពីអាហ្រ្វិក ដើម្បីឲ្យទៅទប់ស្កាត់ការគំរាមកំហែងពីប្រទេសមហាអំណាចចំនួន២
យោធាអាមេរិក កំពុងត្រៀមដកកងទ័ពជាច្រើននាក់ចេញពីទ្វីបអាហ្វ្រិក ក្នុងគោលបំណងផ្លាស់ប្ដូរធនធានរបស់ខ្លួនទៅទប់ស្កាត់ការគំរាមកំហែងពីប្រទេសចិន និងរុស្ស៊ី វិញ។
មន្ត្រីការពារជាតិអាមេរិក បានឲ្យដឹងកាលពីថ្ងៃទី១សីហាកន្លងទៅថា តំបន់ដែលត្រូវដកកម្លាំងទ័ពអាមេរិកមកវិញ គឺនៅបណ្ដាប្រទេសអាហ្វ្រិកកណ្ដាល និងអាហ្វ្រិកខាងលិច ដែលជាកន្លែងផ្ដោតសំខាន់ទៅការហ្វឹកហាត់កងទ័ពក្នុងតំបន់ពីយុទ្ធសាស្ត្របង្ក្រាបក្រុមឥស្លាមជ្រុលនិយម។
បើតាមលោក Thomas Waldhauser មេដឹកនាំបញ្ជាការអាមេរិកប្រចាំអាហ្វ្រិក បានប្រាប់ថា ការដកទ័ពនេះ នឹងចាប់ផ្ដើ់មចេញពីប្រទេសអាហ្វ្រិកកណ្ដាលដូចជា ប្រទេសកាមេរ៉ូន ជាដើម។ លោក Waldhauser បានបន្តថា អាមេរិកនឹងមិនដើរចោលអាហ្វ្រិកជារៀងរហូតនោះទេ ហើយអាមេរិកនឹងរក្សាសិទ្ធិត្រឡប់ទៅឈរជើងវិញជាឯកតោភាគី ក្នុងករណីចាំបាច់ដើម្បីការពារផលប្រយោជន៍របស់ខ្លួន៕
Comments
Post a Comment