ផលិតកម្ម Wonder Film បានសម្ពោធដាក់បញ្ចាំងខ្សែភាពយន្តខ្នាតធំរឿង "ស្នូរជើងអ្នកណា?" ជាផ្លូវការហើយ នៅផ្សារទំនើបអ៊ីអន២ សែនសុខ កាលពីល្ងាចម្សិលមិញ។
លោក សែម វិសាល ចាងហ្វាងផលិតកម្ម Wonder Film ឲ្យដឹងថា រឿង "ស្នូរជើងអ្នកណា?" ជាស្នាដៃទី៣របស់លោក បន្ទាប់ពីរឿង "ប្រាសាទកំបាំងមុខ" និង "ផ្ទះចិញ្ចឹមខ្មោច"។ "ចំពោះរឿងមួយនេះ យើងចំណាយដើមទុនក្នុងការផលិតអស់ច្រើនជាងរឿងមុនៗ ព្រោះយើងប្រើពេលវេលាថតយូរ។ ពិសេសទៅលើបច្ចេកទេសប្លង់ថតតែម្ដង គឺយើងធ្វើទៅតាមស្តង់ដារអន្តរជាតិ បានជាចាយដើមទុន ៧ទៅ ៨ម៉ឺនដុល្លារដូច្នេះ" ។ លោក សែម វិសាល ថ្លែងបញ្ជាក់។
"ស្នូរជើងអ្នកណា?" ជាប្រភេទខ្សែភាពយន្តភ័យរន្ធត់ លាយឡំជាមួយឈុតឆាកកំប្លែង និងមានចំណុចលើកទឹកចិត្តស្ត្រីឲ្យក្លាហាន ហ៊ានក្រោកឈរឡើងដើម្បីតទល់នឹងការពិត។ រឿងនេះ ចូលរួមសម្ដែងដោយលោក សេម អ្នកនាង លីញលីញ យូអ៊ីន នីតា ណារ៉ា ព្រមទាំងតារាសម្ដែងប្រុសស្រីជាច្រើនរូបទៀត។
ខ្សែភាពយន្តនេះ ត្រូវដាក់បញ្ចាំងគ្រប់រោងភាពយន្តទំនើបៗ នៅរាជធានីភ្នំពេញ និងខេត្តចាប់ពីថ្ងៃទី ១៩ ខែ កក្កដា ឆ្នាំ ២០១៨នេះហើយ៕
Comments
Post a Comment