លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងថា នៅក្នុងជំនួបជាមួយរដ្ឋមន្ត្រីក្រសួងការបរទេសអូស្ត្រាលី ជប៉ុន កូរ៉េខាងជើង កូរ៉េខាងត្បូង រុស្ស៊ី ឥណ្ឌូនេស៊ី អំពីដំណើរការបោះឆ្នោតនៅកម្ពុជា កាលពីថ្ងៃទី២៩ ខែកក្កដា ឆ្នាំ២០១៨។ លោកថា ការបោះឆ្នោតគឺមានរបៀបរៀបរយ មានតម្លាភាព សេរី យុត្តិធម៌ ត្រឹមត្រូវ គ្មានអំពើហិង្សា គ្មានការគំរាមកំហែង។ បើឆ្លុះបញ្ចាំងទៅនឹងការបោះឆ្នោតនៅប្រទេសផ្សេង គឺមានអំពើហិង្សា និងមានមនុស្សស្លាប់។
លោកបញ្ជាក់ថា អត្រាប្រជាពលរដ្ឋទៅបោះឆ្នោតមានជាង ៨២% ខណៈមានការធ្វើយុទ្ធនាការម្រាមដៃស្អាត ដេកផ្ទះឈ្នះឯង មិនទៅបោះឆ្នោត គឺប្រជាពលរដ្ឋមិនស្តាប់តាមការអំពាវនាវនេះ។
លោកទេសរដ្ឋមន្ត្រីបានប្រាប់ទៅបណ្តារដ្ឋមន្ត្រីក្រសួងការទេសទាំងនោះថា ប្រជាពលរដ្ឋជាង ៨២% ពេញចិត្តនូវការប្រើសិទ្ធិរបស់គេ ដោយគ្មានការគំរាមកំហែង។ ប្រជាពលរដ្ឋទៅបោះឆ្នោត ដើម្បីស្ថេរភាព និងសន្តិភាព។
ការថ្លែងរបស់រដ្ឋមន្ត្រីក្រសួងការបរទេសកម្ពុជា បានធ្វើឡើងក្នុងពិធីប្រគល់រង្វាន់ដល់និស្សិតជ័យលាភីថ្នាក់ជាតិនៃការប្រគួតប្រជែងការយល់ដឹងអំពីអាស៊ានឆ្នាំ២០១៨ នៅទីស្តីការក្រសួង នៅព្រឹកថ្ងៃទី៧ ខែសីហា ២០១៨នេះ៕
Comments
Post a Comment