លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បានហៅការលើកឡើងរបស់ជប៉ុន ដែលថា ការបោះឆ្នោតនៅកម្ពុជា ថាជា "ការខកចិត្ត" នោះ គឺដើម្បីប្រយោជន៍សម្រាប់យុទ្ធសាស្រ្តភូមិសាស្រ្តនយោបាយរបស់ជប៉ុនតែប៉ុណ្ណោះ។
លោកមានប្រសាសន៍កាលពីថ្ងៃទី៥សីហាយ៉ាងដូច្នេះថា៖ «ខ្ញុំចង់និយាយរឿងនយោបាយ ដែលនយោបាយកំពុងតែកៀងគរឲ្យមានប៉ូលដែលហៅថា "Geopolitics" យុទ្ធសាស្ត្រភូមិសាស្ត្រនយោបាយ ដែលកំពុងតែអូសទាញបង្កើតឲ្យមានភូមិសាស្ត្រនយោបាយ ដែលគេចង់យកកម្ពុជាជាអាយ៉ងរបស់ប្រទេសនោះឯង»។
លោក ផៃ ស៊ីផាន បានអះអាងថា ជប៉ុននៅតែជាភាគីដៃគូអភិវឌ្ឍន៍ ដៃគូកិច្ចសន្ទនា និងកិច្ចសហប្រតិបត្តិការល្អជាមួយកម្ពុជា។
សូមរំលឹកថា ទូរទស្សន៍ជប៉ុន NHK បានដកស្រង់សម្តីលោក Taro Kono រដ្ឋមន្រ្តីការបរទេសជប៉ុន ដែលសម្តែងនូវការព្រួយបារម្ភអំពីការបោះឆ្នោតនៅកម្ពុជា នៅចំពោះមុខលោក ប្រាក់ សុខុន រដ្ឋមន្រ្តីក្រសួងការបរទេសកម្ពុជា ក្នុងកិច្ចប្រជុំមួយនៅប្រទេសសិង្ហបុរី កាលពីថ្ងៃទី៤ ខែសីហា ឆ្នាំ២០១៨។
ក្នុងជំនួបនោះ លោក Taro Kono បានប្រាប់លោក ប្រាក់ សុខុន ថា លទ្ធផលបោះឆ្នោតនៅកម្ពុជា គឺជាការខកចិត្ត ខណៈដែលសន្លឹកឆ្នោតជាច្រើនត្រូវបានចាត់ទុកថា មិនបានការ បើទោះបីជាជប៉ុន បានផ្តល់ការគាំទ្ររបស់ខ្លួន ដើម្បីធានាថា ការបោះឆ្នោតនេះ គឺបង្ហាញពីឆន្ទៈរបស់អ្នកបោះឆ្នោតក៏ដោយ។
លោកក៏បានជំរុញឲ្យរដ្ឋាភិបាលកម្ពុជា បន្តនូវដំណើរការលទ្ធិប្រជាធិបតេយ្យ ដោយបង្កើតនូវបរិយាកាសសម្រាប់ការពិភាក្សាជាមួយគណបក្សប្រឆាំង។
បើយោងតាមទូរទស្សន៍ NHK លោក ប្រាក់ សុខុន បានឆ្លើយតបវិញថា ប្រទេសកម្ពុជា បានដំណើរការការបោះឆ្នោតដោយប្រជាធិបតេយ្យ។
គណៈកម្មាធិការជាតិរៀបចំការបោះឆ្នោត បានប្រកាសថា ចំនួនប្រជាពលរដ្ឋដែលទៅបោះឆ្នោតមានដល់ទៅជិត៨៣ភាគរយ ខណៈសន្លឹកឆ្នោតមិនបានការមានដល់ទៅជិត៦០ម៉ឺនសន្លឹក។
កាលពីសប្តាហ៍មុន ក្រសួងការបរទេសកម្ពុជា ក៏បានចេញសេចក្តីថ្លែងការណ៍ផងដែរ បង្ហាញពីភាពសោកស្តាយចំពោះប្រទេសមួយចំនួន ដែលបានវាយតម្លៃថា ការបោះឆ្នោតនៅកម្ពុជា គ្មានភាពសេរី ត្រឹមត្រូវ យុត្តិធម៌ មិនតំណាងឱ្យឆន្ទៈប្រជាជនខ្មែរ និងមិនអាចទទួលយកបានឡើយ៕
Comments
Post a Comment